Onazi yarn say hin join body wit Trabzonspor to clear hin mind
Ogenyi Onazi don finally open mouth yarn why hin really go Trabzonspor for Turkey from Lazio wey dey Italo.
De Naija defensive midfielder bin yarn say na to clear hin mind o.
Onazi enter Turkey go sign four-year contract wit Trabzonspor after dem pay 5 million Euros for am.
“I need make dis move to take clear my head and to joli ontop my tapping of ball again,” naso hin relate BBC Sport.
Onazi don yarn say make nobody worry ontop gbege wey dem tink fit shele for Turkey becos of coup wey no successful ontop de president of de land Recep Tayyip Erdogan for July.
“As for me o, I tink say security mata na de same everywia. Nobody dey 100% safe for dis life. Na to dey pray to God make hin protect us o.”
Na five years Onazi use tap ball for Lazio after hin join body from My People FC. Hin tear net seven times inside 110 appearances.
Injury bin do am strong tin for Lazio and hin almost comot from de Italo club for January when hin almost go Werder Bremen for borrow-borrow level.
Na only times hin tap ball last season and de new coachie wey enter for April, Simone Inzaghi, bin use am wella.
“Na personal mata make me comot for Lazio,” naso Onazi relate..
