Isaac Success don kolobi work permit to tap ball for Watford

Naija small pikin striker Isaac Success don kolobi work permit to tap ball for hin new club Watford FC.

As per amebo wey Sports Ration gather, United Kingdom authority pipu bi grant am de permit on July 13 but hin collect de document on Tuesday, July 26.

Success neva tap ball at all for Super Eagles of Naija but to get work visa na moi-moi for de guyman.

De befor-befor Granada player fit play hin first Premier League match for Watford when dem wear one trouser wit Southampton on August 13..