Executive governor of Rivers state, Ezenwo Nyesom Wike don dash players of Rivers United seven million naira after de boys kpokpo Shooting Stars SC 2-kondo on Sunday as hin take promise dem.
De governor bin dey for ground Yakubu Gowon Stadium, Port Harcourt as hin boys dey rubbish Oluwole Warriors and hin don yarn dem say hin go dash dem de money if dem fit win to take ginger dem wella.
Rivers United don show beta sabiness dis season as dem dey number 3 for table now wit 44 points and dem still dey for Federation Cup dey make sense.
No be only 7 million de players go collect dis season as de governor don yarn say hin go dey dash dem 3.5 million naiara anytime wey dem play draw for away dis season and if dem win for away dem go kolobi 7 million naira again.
Wike also bin promise say hin go dash de players $50,000 if dem fit beat anybody wey qualify com play dem for quarter final of Federation Cup inside Enyimba or J.Atete.
Na joli time for Rivers United now o, all dem need to dey do to dey live Dangote life na to dey win dey go..